Somorrostro Prestakuntza Zentroak Tknikak antolatutako lan-jardunaldia hartu du gaur. Bertan, Euskadiko Lanbide Heziketako 50 zentro baino gehiagotako berrikuntza-zuzendariek eta -arduradunek parte hartu dute. Bizkaiko, Gipuzkoako eta Arabako ikastetxe publikoetako eta itunpeko ikastetxeetako ordezkariak bildu dira topaketa horretan, ikastetxeetan berrikuntza transferitu eta ustiatzeari buruz hausnartzeko.

Jardunaldian, ikastetxeetan sortzen diren ekimen berritzaileak hainbat eremutan nola lekualdatu eta aplika daitezkeen aztertu da, eta barneko (metodologietan, irakasleetan eta ikasleetan) nahiz kanpoko (enpresetan, gizartean eta beste ikastetxe batzuetan) eragina izan dezakete. Transferentzia eraginkorra lortzeko, funtsezkoa da aztertzea nondik abiatzen den berrikuntza, zer baliabide dauden eta nola aprobetxa daitezkeen ahalik eta gehien.

Somorrostroko berrikuntza-eredua izan da saioaren ardatz nagusia, eta Sergio San Martín berrikuntza-zuzendariak, Andoni González komunikazio-arduradunak eta Vanessa Moreno berrikuntza-errutinen arduradun eta berrikuntza-taldeko kideak parte hartu dute. Beren hitzaldien bidez, proiektu berritzaileen transferentzia-prozesuan lortutako arrakastak eta ikaskuntzak partekatu dituzte, eta ikastetxeak arlo horretan izan duen bilakaera nabarmendu dute.

Jardunaldiari amaiera emateko, bertaratutakoek bisita gidatua egin dute Somorrostroko campusean. Bertan, zentroaren historia eta bilakaera bertatik bertara ezagutzeko aukera izan dute, betiere sorrerako balioekin bat eginez. Ibilbide horri esker, zentro ireki eta bere ingurunean integratuaren espiritua transmititu ahal izan da, berrikuntzarekin eta etengabeko hobekuntzarekin duen konpromisoaren isla..

Jardunaldi hau aukera bikaina izan da euskal Lanbide Heziketan berrikuntzaren kultura finkatzen jarraitzeko eta ikastetxeen arteko lankidetza indartzeko, hezkuntzan eta gizartean benetako eragina duten proiektuak bultzatzeko.